Kryeministri i Hungarisë, Viktor Orban, tha të premten se Ukraina e ka humbur tashmë luftën kundër pushtimit rus dhe se presidenti i zgjedhur amerikan, Donald Trump, do ta ndërpresë mbështetjen e SHBA-së për Kievin. Orban është pritës i samitit dyditor të nisur në kryeqytetin hungarez Budapest, ku lufta në Ukrainë ishte lart në agjendë në takimin e liderëve të 27 vendeve anëtare të Bashkimit Evropian, shumica e të cilëve besojnë se vazhdimi i furnizimit të Ukrainës me armë dhe ndihmë financiare janë elemente të rëndësishme për sigurinë e kontinentit. Duke folur në radion shtetërore të premten në mëngjes, Orban, i afërt me Trumpin dhe presidentin rus Vladimir Putin, përsëriti qëndrimin e hershëm se duhet të shpallet armëpushim i menjëhershëm. Ai parashikoi se Trump, që fitoi zgjedhjet në SHBA këtë javë, do t’i japë fund luftës në Ukrainë. “Sikur Donald Trump t’i kishte fituar zgjedhjet e vitit 2020 në Shtetet e Bashkuara, këto dy vjet ankthi nuk do të kishin ndodhur, nuk do të kishte pasur luftë”, tha Orban.