Qendra Kombëtare e Urgjencës Mjekësore ka reaguar pas protestës së banorëve të Vaut të Dejës, të cilët kërkuan shërbim urgjence 24 orë dhe ambulancë në zonë, pas vdekjes së dy personave nga goditja elektrike më 29 gusht. Në ngjarjen tragjike në fshatin Karmë humbën jetën 40-vjeçari Sokol Preka dhe 46-vjeçari David Deda. Banorët kanë pretenduar se ambulanca mbërriti me rreth 1 orë e 30 minuta vonesë, duke ngritur shqetësime për mungesën e shërbimit të urgjencës në zonë. Në reagimin zyrtar, Qendra Kombëtare e Urgjencës Mjekësore sqaron se rasti i parë u raportua në orën 18:03, ndërsa ambulanca e Vaut të Dejës ndodhej jashtë funksionit për shkak të një defekti teknik. Për këtë arsye, drejt vendngjarjes u nis ambulanca nga Spitali i Shkodrës, e cila mbërriti në orën 19:44. Reanimimi kishte nisur ndërkohë nga një infermiere e zonës dhe vijoi edhe gjatë transportit, por pacienti nuk arriti të mbijetonte.