Ndonëse nuk i ka vënë një emër, ambasadori i Shteteve të Bashkuara në Kosovë, Jeffrey Hovenier, është shprehur se pas sulmit ndaj Policisë së Kosovës në fshatin Banjskë të Zveçanit mund të jenë disa struktura dhe një mbështetje jo e vogël. Deklarata është bërë në një intervistë për BBC, teksa thekson se kalibi I armëve por edhe sasia e madhe e gjetur, është tregues se “sulmuesit serbë etnikë nuk i siguruan ato vetë”. “Tani, po ashtu, ne e dimë se një individ i cili ishte nënkryetar i njërës nga partitë serbe në Kosovë, për të cilin dihet se ka marrë pjesë në ngjarje me zyrtarë të lartë serbë, njoftoi përmes avokatit të vet se ai ishte organizator i kësaj ngjarjeje dhe se ai ishte i pranishëm”, tha Hovenier duke iu referuar Millan Radoiçiqit, nënkryetarit të deritanishëm të Listës Serbe - partisë më të madhe të serbëve në Kosovë. Nga ana tjetër, ambasadori I SHBA, Hovenier ka theksuar se po punohet që në bashkëpunim me autoritetet vendase të zbulohet organizatori i sulmit terrorist, pasi ende nuk ka një përgjegjës zyrtar. “Pra, ne ende po punojmë për ta gjetur se kush ishte saktësisht përgjegjës. Por, tani dimë më shumë rreth kësaj dhe jemi të shqetësuar për atë që ndodhi”, -deklaroi Hovenier. Ndërkohë më I matur është treguar ambasadori i SHBA në Serbi, I cili ka dënuar sulmin, pa pranuar ta quajë terrorist.