Bursa shqiptare e energjisë nuk plotëson ende kriteret për të shërbyer si referencë të shitjes së energjisë elektrike të prodhuar nga burimet e rinovueshme. Enti Rregullator i Energjisë ka krahasuar kërkesë-ofertën në tregun e ditës në avancë të bursës shqiptare ALPEX me lëvizjet në bursën e energjisë të Hungarisë, Polonisë, Kroacisë dhe Rumanisë. Pas këtij krahasimi, ERE thotë se në tregun shqiptar të energjisë elektrike, përfshirja e prodhuesve të energjisë së rinovueshme në tregtimin e ditës në avancë mund të shkaktojë luhatje të mëdha të çmimit dhe nuk garanton qëndrueshmëri si për shitësin, ashtu edhe për blerësin e saj. Enti deklaron se ka analizuar tregun e bashkuar Shqipëri-Kosovë të ditës në avancë dhe konstaton se pavarësisht progresit të bërë prej ngritjes së këtij tregu në vitin 2024, ai nuk garanton deri më tani likuiditetin e nevojshëm për të përfshirë edhe burimet e rinovueshme të energjisë në të. Enti vëren në raport se tregu shqiptar është i përqëndruar në anën e blerësve, por konkurrues në anën e shitjes. Kjo do të thotë se përfshirja e prodhuesve nga burimet e rinovueshme në tregun e ditës në avancë, do të thellojë edhe më tej pabarazinë mes ofertës dhe kërkesës.