Enkelejd Alibeaj do të jetë kryetari i ri i Partisë Demokratike, deri në zgjedhjet e reja, një anëtarë një votë. Lajmi u konfirmua nga Sekretari i Përgjithshëm i Partisë Demokratike, Gazmend Bardhi ku në një komunikatë për shtyp tha se nënkryetarja e PD-së, Jorida Tabaku hoqi dorë nga e drejta statutore për t’u propozuar në Këshillin Kombëtar për drejtimin e Partisë, dhe e drejta për të drejtuar Partinë Demokratike automatikisht i kaloi Alibeajt. Ndërkohë, pasi Lulzim Basha dha dorëheqjen si kryetar i Partisë Demokratike, ai u largua nga selia, ndërsa deputetët e Grupit Parlamentar vijuan mbledhjen, duke përpiluar një draft deklaratë mbi situatën e krijuar. Sipas asaj që u lexua nga Alibeaj, grupi parlamentar vlerëson aktin e dorëheqjes së kryetarit të PD në funksion të zgjdhjes së problematikës, që ka shkaktuar një përçarje të thellë nga qendra në bazë. Ndërkohë, në deklaratën e grupit është shkruar e zeza mbi të bardhë, se i bëhet thirrje anëtarëve të pezulluar të grupit parlamentar që të ofrojnë të njëjtin mekanizëm për tërheqjen e Berishës nga fushata e tij. Sipas shumicës së deputetëve kërkohet që ish-lideri historik të distancohet nga vendimmarrja në parti, duke u bere pjese e zgjidhjes per te shmangur percarjen dhe per te bere te mundur bashkimin e demokrateve. Një tjetër pikë që vihet në dukje në atë që konsiderohet si një draft deklaratë lidhet me respektimin e vlerave dhe parimeve statutore, për shmangien e pasojave të deklaruara publikisht nga SHBA. Në pikën tre të draft deklaratës thuhet se grupi parlamentar shpreh gatishmerine per te negociuar me deputetët e pezulluar që i janë bashkuar lëvizjes politike të Berishës per te gjetur nje zgjidhje te pranueshme dhe per t’i hapur rruge bashkimit. Në fund të deklaratës kërkohet gati me ton ultimativ nisja e një fushate ndërgjegjësuese me bazën për bashkim.