Aktivisti konservator amerikan Charlie Kirk, aleat i Presidentit Donald Trump, u qëllua për vdekje të mërkurën ndërsa fliste në një universitet në Utah, duke ndezur një operacion të madh kërkimi për një snajper të vetëm, i cili, sipas guvernatorit, ka kryer një vrasje politike. Autoritetet thanë se ende nuk kishin arrestuar asnjë të dyshuar, deri të mërkurën në mbrëmje, rreth tetë orë pas të shtënave në kampusin e Universitetit Utah Valley në Orem, në mesditë, gjatë një eventi ku morën pjesë 3,000 persona. Autori i vetëm i dyshuar për të shtënat që vranë 31 vjecarin Kirk, me sa duket ishte pozicionuar në një çati, larg nga kampusi dhe është ende i lirë, sipas zyrtarëve të rendit. Policia lëshoi një deklaratë të mërkurën në mbrëmje duke thënë se dy burra ishin ndaluar dhe njëri ishte marrë në pyetje nga forcat e rendit, por të dy u liruan më pas. "Nuk ka lidhje mes të shtënave dhe asnjërit prej këtyre individëve", thuhej në deklaratë. "Ka nisur një hetim dhe një operacion kërkimi për autorin e të shtënave." Në një videomesazh të regjistruar në Zyrën Ovale dhe të postuar në platformën online Truth Social, presidenti Donald Trump u zotua se administrata e tij do ta gjurmonte të dyshuarin. "Administrata ime do të gjejë secilin prej atyre që kontribuan në këtë mizori dhe në akte të tjera dhune politike, përfshirë organizatat që e financojnë dhe e mbështesin atë", tha Trump. Imazhet video të vrasjes të postuara në internet tregonin Kirk duke iu drejtuar një turme të madhe në kampus, rreth 64 km në jug të Salt Lake City, rreth orës 12:20 minuta, kur u dëgjua një e shtënë. Vrasja është e fundit në një seri sulmesh ndaj figurave politike amerikane, përfshirë dy atentate ndaj vetë Trumpit vitin e kaluar, të cilat kanë nënvizuar një rritje të ndjeshme të dhunës politike.