Udhëheqësi autoritar i Bjellorusisë, Aleksandër Lukashenko, nuk u pa të dielën në ceremonitë e Ditës së Flamurit Kombëtar, Stemës dhe Himnit, ndërsa po qarkullojnë zëra se ai është në gjendje jo të mirë shëndetësore. Kryeministri bjellorus, Raman Halouchanka, lexoi një fjalim në emër të Lukashenkos. Gjatë tre javëve të fundit, janë organizuar disa evente publike, në të cilat Lukashenko ka munguar. Megjithatë, nuk ka asnjë njoftim zyrtar për gjendjen shëndetësore të 68-vjeçarit. Të shtunën, një raport i paverifikuar pretendonte se ai ishte dërguar në një spital në Minsk. Lukashenko mori pjesë në festimet e Ditës së Fitores së 9 majit në Moskë, ku nuk dukej mirë dhe dora e tij e djathtë ishte mbuluar me një fashë. Një anëtar i Dumës ruse u citua nga mediat e Moskës të thoshte se Lukashenko ishte i sëmurë, por se nuk ishte asgjë e jashtëzakonshme.