Ushtria britanike së bashku me Shtetet e Bashkuara kanë kryer sulme ajrore ndaj rebelëve Huthi në Jemen, thanë zyrtarët britanikë mëngjesin e të martës. Kjo është përfshirja e parë e ushtrisë britanike në fushatën e re ajrore amerikane që ka në shënjestër grupin që mbështetet nga Irani. Mbretëria e Bashkuar ka ofruar një shpjegim të detajuar për kryerjen e sulmeve, ndryshe nga SHBA-ja, e cila ka ndarë pak detaje lidhur me më shumë se 800 sulmet që ka kryer që kur ka nisur fushatën ajrore më 15 mars. Operacioni i quajtur “Rough Rider” (Raf rajder), ka shënjestruar rebelët teksa administrata e presidentit amerikan, Donald Trump, po negocion me përkrahësin kryesor të rebelëve jemenas, Iranin, lidhur me programin bërthamor të Teheranit që po përparon shpejt. Ministria e Mbrojtjes e Mbretërisë së Bashkuar tha se ka sulmuar “një grup ndërtesash, që përdoren nga rebelët Huthi për të prodhuar dronë si ata që përdoren për të sulmuar anijet në Detin e Kuq dhe Gjirin e Adenit, dhe vendndodhja e sulmit ishte rreth 25 kilometra në jug të kryeqytetit, Sana”. Sipas Ministrisë, në sulme morën pjesë avionët e llojit Typhoon FGR4 (tajfun FGR4), të cilët lëshuan bomba të llojit Paveëay IV (pejvuej 4).