Qeveria e Francës rriti alarmin e saj të sigurisë, në nivelin më të lartë të dielën pas sulmit vdekjeprurës në një sallë koncertesh në rusi që u mor përsipër nga nga grupi i Shtetit Islamik. Kryeministri Gabriel Attal tha në një postim në X se vendimi, i cili vjen disa muaj përpara se Parisi të organizojë Lojërat Olimpike, u mor "në dritën e marrjes së përgjegjësisë nga Shteti Islamik për sulmin në Moskë dhe kërcënimet që rëndojnë mbi vendin tonë". Njoftimi erdhi pasi presidenti Emmanuel Macron zhvilloi një takim urgjent të kabinetit të sigurisë pas sulmit të së premtes në Moskë që mori të paktën 137 jetë njerëzish sipas hetuesve rusë. Dega afgane e grupit Shteti Islamikka marrë përgjegjësinë për masakrën, që është edhe sulmi terrorist më vdekjeprurës në Evropë. Sistemi i alarmit për terrorizëm në Francë ka tre nivele dhe niveli më i lartë aktivizohet në vazhdën e një sulmi në Francë ose jashtë saj ose kur një kërcënim konsiderohet të jetë i pashmangshëm. Ky sistem lejon masa të jashtëzakonshme sigurie, siç janë patrullimet e shtuara nga forcat e armatosura në vende publike si stacionet e trenave, aeroportet dhe objektet fetare. Franca është goditur vazhdimisht nga sulme vdekjeprurëse xhihadiste, duke përfshirë masakrën në sallën e koncerteve Bataclan në vitin 2015, ku ekstremistët hapën zjarr ndaj pjesëmarrësve në koncert dhe mbajtën njerëzit peng për orë të tëra. Vendi ishte tashmë në gatishmëri të lartë përpara Lojërave Olimpike dhe Paraolimpike të Parisit që do të mbahen këtë vit e që pritet të tërheqin miliona vizitorë në vend. Shqetësimet për sigurinë janë veçanërisht të larta për ceremoninë e madhe të hapjes së këtyre lojërave më 26 korrik, e cila do të përfshijë barka që lundrojnë përgjatë lumit Senë dhe turma të mëdha që shikojnë nga të dyja anët e saj.