Sipas Shërbimit Sekret Gjerman dhe dy agjencive të inteligjencës holandeze, Rusia ka intensifikuar ndjeshëm përdorimin e armëve kimike në luftën kundër Ukrainës. Qeveria gjermane ka konfirmuar raportimet mbi përdorimin e një lënde kimike e rrezikshme për mushkëritë dhe potencialisht vdekjeprurëse. Zëdhënësi i qeverisë gjermane, Stefan Kornelius, deklaroi se përdorimi i gazit lotsjellës dhe substancave të tjera kimike nga Rusia përbën një shkelje serioze të Konventës për Ndalimin e Armëve Kimike. Edhe ministri holandez i Mbrojtjes, Ruben Brekelmans, informoi parlamentin në Hagë se Rusia po përdor në mënyrë të sistematizuar dhe masive armë kimike në fushën e betejës. Ai e cilësoi këtë një zhvillim alarmues dhe krejtësisht të papranueshëm, që ilustron brutalitetin e agresionit rus. Ministri ukrainas i Mbrojtjes raportoi se deri më tani Rusia ka përdorur mbi 9 mijë herë armë kimike kundër forcave të Ukrainës, ndërsa së paku tre viktima janë identifikuar si të lidhura drejtpërdrejt me efektet e këtyre armëve.