Industria shqiptare e veshjeve dhe këpucëve po përballet me një krizë të thellë, ndërsa të dhënat e fundit të INSTAT tregojnë se eksportet e sektorit vijojnë rënien. Në qershor, eksportet ranë me 3.8%, pas tkurrjes së fortë prej 14.2% në maj. Në total, gjatë gjashtëmujorit të parë të vitit, sektori ka shënuar një rënie prej 6.7%, ose rreth 3.7 miliardë lekë, duke mbetur i vetmi grup i madh eksportues me tendencë të vazhdueshme negative. Sipas revistës Monitor, shkaku kryesor është forcimi i lekut ndaj euros, i cili ka rritur kostot për eksportuesit shqiptarë dhe ka ulur konkurrueshmërinë e tyre në tregjet ndërkombëtare. Pasojat tashmë po ndihen në ekonomi. Disa kompani kanë zhvendosur aktivitetin në vende me kosto më të favorshme, ndërsa investimet e reja në sektor po ngadalësohen. Goditja nuk prek vetëm fabrikat, por edhe transportin, logjistikën, furnizuesit, bizneset lokale dhe mijëra familje që varen nga kjo industri.