Një paralajmërim për suedezët nga dy shefa të mbrojtjes që të përgatiten për luftë, ka ngjallur shqetësime dhe akuza për alarm të ekzagjeruar. Ministri i mbrojtjes civile Carl Oskar Bohlin tha në një konferencë për shtyp se mund të ketë luftë në Suedi. Mesazhi i tij u mbështet më pas nga komandanti i ushtrisë, Gjenerali Micael Byden, i cili tha se të gjithë suedezët duhet të përgatiten mendërisht për këtë mundësi. Sidoqoftë, politikanët e opozitës kanë kundërshtuar tonin e paralajmërimeve. Ish kryeministrja Magdalena Andersson tha në televizionin suedez se pavarësisht se situata është serioze, lufta nuk është pas portës. Organizata e të drejtave të fëmijëve Bris, tha se në linjën kombëtare të saj për ndihmë, zakonisht nuk merren telefonata për mundësinë e luftës. Por këtë javë, ka patur një numër të madh telefonatash nga të rinj që kishin parë raportet në televizione apo postimet në TikTok, që flisnin për luftë.