Një telefonatë anonime ngriti alarm pasditen e kësaj të diele në greqi, pas një paralajmërimi për vendosjen e një bombe në godinën e parlamentit. Sipas informacioneve paraprake, një burrë telefonoi në numrin qendror të Parlamentit dhe deklaroi se brenda ndërtesës ishte vendosur një bombë. Telefonuesi paralajmëroi se do të ndodhte një shpërthim, por nuk dha një orar apo afat të përcaktuar se kur mund të aktivizohej eksplozivi. Pas telefonatës, autoritetet greke u vunë menjëherë në lëvizje. Në Parlament mbërriti njësia për neutralizimin e mekanizmave shpërthyes, e cila nisi kontrollet në ambientet e godinës për të verifikuar nëse kërcënimi ishte real. Pas kontrollit të kryer nga specialistët, nuk u gjet asnjë objekt i dyshimtë apo mekanizëm shpërthyes. Kështu, alarmi rezultoi i rremë dhe situata u normalizua, ndërsa autoritetet vijojnë hetimet për identifikimin e personit që bëri telefonatën dhe për të përcaktuar motivet e tij.