Ekipet spanjolle të shpëtimit gjetën të enjten trupin e një burri që ishte rrëmbyer nga ujërat e përmbytjeve pranë Barcelonës, ndërsa shirat e rrëmbyeshëm goditën zonën lindore mesdhetare të vendit, duke përmbytur rrugët dhe duke shkaktuar ndërprerje në transport. Kjo stuhi e fuqishme goditi vendin pikërisht kur ai po dilte nga vera më e nxehtë e regjistruar ndonjëherë dhe një fillim shtatori jashtëzakonisht të ngrohtë, në një kohë kur Spanja po përballet me pasojat e ndryshimeve klimatike. Agjencia kombëtare e motit, AEMET, lëshoi paralajmërime për reshje të dendura shiu në rajonet lindore të mërkurën, duke aktivizuar për pak kohë nivelin më të lartë të alarmit, atë të kuq, për Barcelonën për shkak të rrezikut të përmbytjeve të menjëhershme. Zjarrfikësit katalanas njoftuan në X se kishin "gjetur trupin e pajetë të një burri" në Olivella, rreth 40 kilometra në perëndim të Barcelonës, duke korrigjuar informacionin e mëparshëm të Mbrojtjes Civile se po kërkohej një grua. Burri po drejtonte një makinë e cila u "rrëmbye nga rryma", shtoi shërbimi i zjarrfikësve. Autoritetet u bënë thirrje banorëve në Katalonjë dhe Valencia, të shmangin udhëtimet e panevojshme dhe të tregojnë kujdes maksimal, ndërsa kryeministri Pedro Sanchez paralajmëroi për "situata shumë të vështira". Në Barcelonë, disa stacione të metrosë u mbyllën dhe autobusët u devijuan ndërsa rrugët ishin të zhytura nën ujë. Edhe trenat rajonalë u ndalën ndërsa fluturimet u vonuan ose u anuluan në aeroportin "El Prat" të Barcelonës, i dyti më i ngarkuari në Spanjë.