Zv.kryemnistrja dhe njëherësh ministre e Infrastrukturës dhe Energjetikes, Belinda Balluku iu përgjigj akuzave të Sali Berishës për Portin e ri të Durrësit. Në një postim në Facebook, Balluku thotë se lufta kundër projektit strategjik të portit të ri të Durrësit është luftë kundër vendosjes së Shqipërisë në hartën e Mesdheut si një pikë e re e rrjetit të tregtisë navale. “Është luftë kundër fuqizimit të Kosovës dhe Maqedonisë së Veriut, si pjesë integrale të projektit të portit të ri, ku në Prishtinë dhe Shkup do të ndërtohen dy porte të thata të lidhura me Durrësin. Është luftë kundër hekurudhës Durrës – Prishtinë dhe Korridorit 8 që pa portin e ri të Durrësit nuk bëjnë asnjë sens. Është luftë kundër sigurisë së Shqipërisë dhe rajonit, që me krahun ushtarak të NATO-s në projektin e portit të ri të Durrësit ngrihet në një nivel tjetër. Është luftë kundër vetë interesit strategjik të Shqipërisë dhe prandaj është një luftë e humbur, e cila bëhet nga ata që kanë dhënë prova se edhe e kanë djegur Shqipërinë për interesat e tyre.” shkruan Balluku. Numri dy I qeverisë deklaron më tej se pavarësisht baltës që po hedhin për këtë çështje përgjigjen sipas saj do e marrin me votë. “Sot u ka mbetur vetëm balta që edhe e eksportojnë jashtë në media të huaja, për t’u dukur më të besueshëm kur e hedhin pastaj këtu. Por sa më shumë baltë të hedhin, aq më thellë ajo baltë do t’i përpijë pranverën që vjen, kur do ta marrin përgjigjen jo me baltë, po me votat e shqiptarëve.”, nënvizon ajo ndërsa thekson se qeveria do të vijojë punën edhe më shpejt për t’u ulur në tryezën e BE , kjo sipas saj, falë dhe mandatit të katërt që Edi Rama do të sigurojë në zgjedhjet e ardhshme.