Akuzave të Rai 3 dhe opozitës italiane, kryeministrja Giorgia Meloni i përgjigjet me një vizitë në Shëngjin, ku së bashku me homologun e saj shqiptar, Edi Ramën do të shohin nga afër ecurinë e punimeve për ndërtimin e kampeve të emigrantëve. Qeveria italiane njofton se më 5 qershor, në orën 12 e 20 minuta, Meloni dhe Rama do të jenë në Shëngjin. Mësohet gjithashtu se pas inspektimit të punimeve, dy kryeministrat do të kenë një konferencë të përbashkët për mediat nga Shëngjini. Emisioni ‘Report’ në Rai 3 zbuloi se kontrata me vlerë 134 milionë euro për menaxhimin e kampeve në Shëngjin, është lidhur nga qeveria italiane me kompaninë ‘Medihospes’, e cila sipas investigimit të Rai3 është një kompani që lindi nga hiri i ‘La Cascine’, shoqëri e shkrirë në kuadër të hetimit ‘Mafia Capitale’ në vitin 2015.