Kryeprokurori i Sarandës, Kledian Llaho është pezulluar nga Gjykata e Posaçme, pasi akuzohet për veprën penale të korrupsionit pasiv të punonjësve të drejtësisë. SPAK regjistroi emrin e kryeprokurorit më 6 janar të këtij viti si person në hetim dhe kërkoi nga gjykata e posaçme caktimin e masës së sigurimit personal të pezullimit nga detyra. Prokuroria e Posaçme thotë se magjistrati dyshohet se ka kryer veprime me natyrë korruptive, duke kërkuar përfitime të parregullta materiale, të cilat transferoheshin drejtpërdrejt te vjehrri i tij. Përveç këtij episodi, SPAK pohon se ka dyshime edhe për veprime të tjera korruptive të kryeprokurorit të Sarandës, për të cilat po heton. Aktualisht Kledian Llaho, veç hetimit penal në SPAK është edhe nën shqyrtim administrativ edhe nga Këshilli i Lartë i Prokurorisë. KLP u vu në lëvizje ndaj tij pas ankesës së Inspektoriatit të Lartë të Drejtësisë.