Pas sulmit terrorist në Banjskë të Zveçanit, të dielën e 24 shtatorit, banorët e brezit kufitar me Serbinë thonë se ndjehen të frikësuar e të rrezikuar nga prania e xhandarmërisë së Serbisë. Janë 352 kilometra vijë kufitare me Serbinë dhe pjesa më e madhe e saj është zonë e militarizuar. Nga gushti i vitit 2001, Serbia ka ngritur rreth kufirit 48 baza operative të avancuara, 28 të ushtrisë dhe 20 të xhandarmarisë. Sipas Qeverisë së Kosovës gjatë së shtunës Serbia ka vënë në gjendje gatishmërie në të gjitha bazat, përfshirë edhe vendosjen e sistemeve kundër-ajrore dhe artilerisë së rëndë. Lëvizje të ushtrisë serbe janë bërë nga tri drejtime të ndryshme; njësitë e Brigadës së dytë të ushtrisë serbe kanë lëvizur nga drejtimi i Rashkës në drejtim të kufirit verior, njësitë e Brigadës së Tretë të ushtrisë serbe kanë lëvizur nga Regjioni i Nishit në drejtim të kufirit veri-lindor të Kosovës dhe njësitë e Brigadës së katërt kanë lëvizur nga Regjioni i Vranjës në drejtim të kufirit lindor. Nga Vranja baza më e afërt nga kufiri lindor është në Vratagosh, rreth 15 kilometra nga fshati Karaçevë. Më 7 gusht 2020, xhandarmëria serbe kishte hyrë thellë në territorin e këtij fshati dhe sot, frika është kthyer sërish.