Narges Mohammadi ka fituar këtë vit Çmimin Nobel për paqe për luftën e saj për pavarësinë e grave në Iran. Ajo aktualisht është në burg për shkak të aktivitetit të saj për të luftuar shtypjen e grave në Iran. “Komitet Norvegjez i Nobelit ka vendosur të nderojë me Çmimin Nobel për Paqen për vitin 2023, Narges Mohammadin, për luftën e saj kundër shtypjes së grave në Iran dhe për luftën e saj për të promovuar të drejtat e njeriut dhe lirinë për të gjithë”, thuhej në shpalljen e vendimit. Mohammadi, 51-vjeç, është një prej aktivisteve kryesore për të drejtat e njeriut në Iran dhe ka bërë fushatë për të drejtat e grave dhe pezullimin e vendimit me vdekje. Ajo është aktualisht duke vuajtur disa dënime në burgun Evin në Teheran dhe akuzohet për përhapje të propagandës kundër shtetit. Burri i saj, po ashtu aktivist, jeton jashtë iranit, bashkë me dy fëmijët e tyre. Pamjet e grave duke protestuar nëpër rrugët e Iranit, duke djegur shamitë e kokës, dhe duke thirrur “Gratë, Jetë, Liri”, janë shpërndarë në gjithë botën. Protestat kundër Qeverisë së Iranit u ndezën pas vdekjes së 22-vjeçares Mahsa Amini, në duart e policisë iraniane, pasi ishte ndaluar për shkak se nuk e kishte vendosur sic duhej shaminë e kokës. Autoritetet e shtypën më pas protestën, duke lënë qindra njerëz të vdekur. Fushata e Mohammadit për lirinë e shprehjes dhe liritë e grave, ka shtyrë regjimin e iranit që ta arrestojë atë 13 herë, ta dënojë pesë herë, dhe ta lërë për 31 vite në burg.