Të paktën 30 urdhër-arreste janë lëshuar nga prokuroria për një grup personash që dyshohet se shpërndanin kokainë dhe drogëra të tjera në rrugët e Tiranës. Burimet nga Policia e Tiranës pohojnë se nuk bëhet fjalë për një grup të vetëm, por për disa grupe që vepronin në disa zona të kryeqytetit. Aksioni konsiderohet si kulmimi i një hetimi katërmujor, ku agjentë të infiltruar të Policisë së Shtetit kanë kryer blerje të simualara droge, që nga hashashi, deri te kokaina dhe ekstazia. Në gjurmët e këtij rrjeti është rënë gjatë një operacioni të ndërmarrë verën e vitit të kaluar, ku policia arrestoi disa persona për shpërndarje lëndësh narkotike, njëri prej të cilëve i dyshuar si pikë shumice në furnizimin e kokainës në lagjet e Tiranës. Policia nuk ka dalë ende me një deklaratë zyrtare në lidhje me numrin e urdhër-arresteve që ka ekzekutuar.