Gjykata e Apelit Tiranë ka ndryshuar masën e sigurisë ndaj producentit Petri Bozo, duke zëvendësuar “arrestin në burg” me “arrest në shtëpi”. Me këtë vendim, gjykata ka urdhëruar edhe lirimin e tij të menjëhershëm nga paraburgimi. Bozo u vu në pranga pas aksidentit tragjik në aksin Elbasan-Librazhd, pranë shkollës së fshatit Mengël, ku humbi jetën nxënësi i klasës së parë, Algit Samurri. Kërkesa e mbrojtjes për ndryshimin e masës ishte rrëzuar fillimisht nga Gjykata e Elbasanit, por pas ankimit, Apeli vendosi të caktojë një masë më të lehtë sigurie. Sipas dëshmitarëve në vendngjarje, fëmija po kalonte rrugën bashkë me nënën, por në një moment i ka shpëtuar vëmendjes së saj dhe ka përfunduar poshtë rrotave të makinës. Nga ana tjetër, producenti në dëshmnë e tij ka mohuar se po lëvizte me shpejtësi në momentin e ngjarjes, duke thënë se po ecte me 10 km në orë.