Policia e Vlorës arrestoi drejtuesitn e gomones, i cili mesditën e së shtunës goditi një pushues në Karaburun. 42 vjecari me iniciale FT, u vendos në pranga nën akuzën “Plagosje e rëndë me dashje”. Ky shtetas po ankoronte gomonen në molin e vjetër të ish-ushtrisë në gjirin e “Shën Janit”, kur aksidentalisht dëmtoi një 60 vjecar në këmbë, i cili sapo kishte zbritur nga një anije turistike në det afër këtij moli. 60 vjecari, bamues në Tiranë u dërgua me helikopter drejt spitalit të Traumës për mjekim të specializuar pasi mori plagë të rënda në këmbë, ndërsa aktualisht ndodhet jashtë rrezikut për jetën. Sipas njoftimit të policisë, vendi ku ndodhi ngjarja nuk ishte një zonë plazhi, ndësa bëri me dije po ashtu se mjeti lundrues gomone, u sekuestrua në cilësinë e provës materiale. Prokuroria e Vlorës ka nisur hetimet për ngjarjen në fjalë, ndërsa pritet që drejtuesi i gomones të dalë para gjykatës dhe të njihet më masën e sigurisë.