Prokuroria e Lartë Publike në Novi Sad, ka ngritur aktakuzë kundër 13 personave, përfshirë ish-ministrin e Transportit të Serbisë, Goran Vesiç, dhe ish-drejtoreshën e Infrastrukturës së Hekurudhave të Serbisë, Jelena Tanaskoviç, në lidhje me aksidentin tragjik në stacionin hekurudhor muajin e kaluar. Streha prej betoni në stacionin e rinovuar kohët e fundit në qytetin verior të Serbisë u shemb më 1 nëntor, duke i marrë jetën 15 personave dhe duke lënduar dy të tjerë. Prokuroria në Novi Sad tha të hënën se 13 të dyshuarit ngarkohen me vepra penale si, krim i rëndë kundër sigurisë së përgjithshme, dhe shkaktim i rrezikut të përgjithshëm. Të akuzuarit rrezikojnë deri në 12 vjet burgim nëse shpallen fajtorë. Aktakuza është ngritur pas përfundimit të hetimeve për shembjen e strehës, sipas Prokurorisë. Aksidenti ndodhi pasi stacioni i trenit ishte rinovuar dy herë në vitet e fundit nga një konsorcium prej katër kompanish, i udhëhequr nga Kina. Hekurudha e Serbisë ngul këmbë se rinovimi nuk përfshinte strehën prej betoni, por disa ekspertë e kundërshtojnë këtë. Serbët kanë protestuar rregullisht për aksidentin në Novi Sad për të kërkuar drejtësi. Shembja e strehës është kthyer në një barrë të rëndë politike për presidentin Aleksandar Vuçiç, pasi më shumë se 50 fakultete në katër universitete shtetërore, zyrat e disa rektorëve të universiteteve dhe dhjetëra shkolla të mesme janë bllokuar në solidaritet me protestat. Studentët gjithashtu kanë marrë pjesë në protesta të përditshme, duke bllokuar trafikun për 15 minuta në qytete të ndryshme të Serbisë.