Një fat tragjik i ka shuar buzëqeshjen Klaudio Mirashit vetëm në moshën 23 vjeçare. I riu ndodhej në Barcelonë javën e kaluar, pasi sapo kishte shoqëruar kushëririn dhe mikun e tij në aeroport, por gjatë kthimit ndodhi tragjedia. Klaudio po ngiste një Mercedes A Class kur përgjatë autostradës që lidh aeroportin me qendrën e Barcelonës, një copë llamarine u shkëput nga kamioni që udhëtonte përpara tij. Llamarina theu xhamin e përparmë dhe i shkaktoi therje në qafë 23-vjecarit, i cili ndërroi jetë. Një tjetër aksident tragjik ka ndodhur këtë të shtunë në Itali. Sipas mediave italiane, nga aksidenti tragjik ka ndërruar jetë një shtetas shqiptar. Aksidenti ka ndodhur teksa një makinë tip Range Rover që udhëtonte përgjatë rrugës Saronno-Monza në drejtim të Saronnos, ka humbur kontrollin duke u përplasur me rrethrrotullimin në via Monte Bianco. Pas përplasjes makina është kthyer përmbys duke përfunduar në shinat e trenit, të cilat ndodheshin pranë vendit ku edhe ndodhi aksidenti.