Dy fëmijë kanë gjetur vdekjen dhe një i tretë ka mbetur i plagosur në gjendje të rëndë si pasojë e një aksidenti tragjik që ka ndodhur pak pas orës 14:00 të së dielës në qytetin e Durrësit. Aksidenti ka ndodhur në rrugën që lidh kampusin universitar ‘Aleksandër Moisiu’ me zonën e Spitallës. Të dhënat paraprake nga vendngjarja tregojnë se një automjet tip Mercedes Benz ka përplasur tre fëmijët, që dyshohet se kanë qenë duke luajtur në anë të rrugës. Si pasojë e përplasjes, dy fëmijë të moshës 10 dhe 13 vjeç kanë ndërruar jetë, ndërsa një tjetër, rreth 8 vjeç ka mbetur i plagosur. Ai është shoqëruar mënjëherë në spital, ku ndodhet në gjendje të rëndë për jetën. Drejtuesi i automjetit ka braktisur makinën në vendngjarje dhe është larguar, teksa dyshohet se shkak i aksidentit ka qenë shpejtësia e madhe me të cilën po lëvizte.