Një tjetër aksident tragjik me pasojë vdekjen ndodhi këtë të dielë në aksin rrugor Shkodër-Lezhë. 73-vjeçarja Ikbale Kraja ka humbur jetën dhe tre të tjerë janë plagosur rëndë. Përplasja fatale ka ndodhur saktësisht në afërsi të Dajçit, ndërsa automjeti ka dalë nga rruga. Automjeti drejtohej nga një 20-vjeçare, ndërsa u plagosën një burrë 53 vjeç, një grua 43 vjeçe dhe një 19-vjeçar, të cilët u transportuan për ndihmë mjekësore në Spitalin Rajonal të Lezhës. Ky është aksidenti i 13-të që ndodh në rrugët e Qarkut të Lezhës në harkun kohor prej gati 10 ditëve me një bilanc 4 të vdekur dhe 28 persona të plagosur. Kjo situatë e krijuar ka vënë në alarm dhe Policinë Rrugore e cila ka shtuar prezencën e saj në terren, ku brenda dy javësh janë ndëshkuar me gjoba mbi 1 mijë drejtues automjetesh të cilët janë kapur në shkelje të rregullave të qarkullimit rrugor që bëhen burim aksidentesh.