Dy automjete janë përplasur në aksin rrugor nacional Pushimi i Shoferit–Fier Shegan, pranë daljes së fshatit Rrupaj, duke lënë të plagosur tre persona. Sipas informacioneve paraprake, një automjet me targa greke dyshohet se tentoi të parakalonte një automjet me targa italiane. Si pasojë e manovrës së gabuar, automjeti me targa italiane doli nga rruga dhe përfundoi në kanal. Tre personat që udhëtonin në automjetin me targa italiane, një çift bashkëshortësh dhe djali i tyre, u transportuan me urgjencë në Spitalin e Lushnjës me dy ambulanca. Policia ndodhet në vendngjarje, ku po kryen veprimet për dokumentimin e aksidentit dhe po disiplinon qarkullimin e mjeteve. Ky segment i rrugës njihet për ngushtësinë e tij dhe për fluksin e lartë të automjeteve, çka ka bërë që aty të regjistrohen shpesh aksidente rrugore.