Një aksident fatal që i mori jetën një 26-vjeçareje ndodhi paraditen e kësaj të diele në aksin Pogradec–Qafë Thanë, në afërsi të fshatit Pojskë. Automjeti që drejtohej nga shtetasi G. H., banues në Korçë, është përplasur me një automjet me targa të huaja, me drejtues shtetasin E. LL., banues në Maqedoninë e Veriut. Si pasojë e përplasjes ka ndërruar jetë 26-vjeçarja që ishte pasagjere në automjetin me targa të huaja, si edhe janë dëmtuar drejtuesit e automjeteve dhe dy pasagjerët që ndodheshin në të dy automjetet. Katër të dëmtuarit janë transportuar në spital për të marrë ndihmë mjekësore të specializuar. Ata ndodhen jashtë rrezikut për jetën. Për zbardhjen e rrethanave të aksidentit është ngritur një grup hetimor që po punon për sqarimin dhe dokumentimin e plotë të rastit.