Aida Hajna është emëruar nga Këshilli i Lartë i Prokurorisë si drejtuesen e Byrosë Kombëtare të Hetimit. Vendimi është marrë unanimisht, ku kanë votuar pro saj të gjithë anëtarët e KLP që kanë qenë prezent në këtë seancë plenare. Aida Hajnaj u përzgjodh si drejtuese e BKH-së nga Struktura e Posaçme kundër Korrupsionit dhe Krimit të Organizuar e cila e përzgjodhi atë në garë me tre kandidatë të tjerë. Me miratimin nga KLP-ja tashmë është zëvendës drejtoresha e Policisë së Shtetit do të drejtojë Byronë Kombëtare të Hetimit, të ashtëquajturën ‘FBI-ja shqiptare’. BKH është një institucion, i cili do të ndihmojë SPAK në hetimin e rasteve të korrupsionit në nivele të larta. BKH do të përbëhet nga një drejtor dhe një ekip hetuesish, të cilët duhet të përmbushin standarde të forta, të ngjashme me ato të FBI. Aida Hajnaj ka një karrierë të gjatë në Policinë e Shtetit ku vitet e fundit ka qenë në poste drejtuese si Shef i Sektorit për Hetimin e Pastrimit të Parave, në Drejtorinë për Hetimin e Krimit Ekonomik e Financiar, Drejtor i Përgjithshëm për Kufirin dhe Migracionin dhe së fundmi Zëvendësdrejtor I Përgjithshëm I Policisë së Shtetit.