Kryetari i Bashkimit Demokratik për Integrim Ali Ahmeti, ka thënë se nuk është mirë që janë ftohur marrëdhëniet me Shtetet e Bashkuara të Amerikës dhe Bashkimit Europian. Sipas Ahmetit pa ndihmën e aleatëve është e vështirë që Kosova të bëhet pjesë e NATO-s, raporton Kosova Press. “Ju jeni klasa më e lartë e sakrificës e angazhimeve që Kosova sot është shtet. Por misionet akoma s’kanë mbaruar. Me shumë se sot, ne na duhet uniteti të jemi krahët e njëri-tjetrit. Nuk më vjen mirë që marrëdhëniet janë aq të ftohta me Amerikën e Evropën, sepse pa organizimin e SHBA-së, BE-së dhe aleatëve tanë në NATO është shumë vështirë. Bashkë me aleatët e çliruam Kosovën. Ne na duhet uniteti akoma edhe më i fortë. Nuk më vjen mirë që gjuha shqipe nuk është gjithë zyrtare në qeveri. Kosova në NATO e në BE, të jetojmë të lirë në paqe dhe stabilitet”. Sakaq kryetari i AAK-së, Ramush Haradinaj, u shpreh se viteve të fundit ka pasur shumë sfida për Kosovën. “Kemi të drejtë ta festojmë këtë ditë, sepse UÇK është vlerësuar, ende vazhdon të vlerësohet që arriti ta fitojë lirinë, shtetin, pavarësinë. Ka djem Kosova, do të ketë, do të vijë dita që statusi i kategorive do të rregullohet. UÇK do të ketë shtëpinë e vet në çdo komunë të Kosovës. Kemi mbyll shumë sfida, uroj që vitin që vjen t’i kemi këtu edhe bashkëluftëtarët që po kalojnë në procese gjyqësore. Janë luftëtarët e lirisë, besojmë në pafajësinë e tyre”. Haradinaj tha më tej se Dita e Veteranit do të jetë festë zyrtare në Kosovë.