Arben Ahmetaj ka reaguar përmes rrjeteve sociale pas lajmit se Ministria e Drejtësisë ka dorëzuar një kërkesë të re në Zvicër për ekstradimin e tij në Shqipëri. Ahmetaj e konsideron lajm të rremë dhe thotë se kërkesa për ekstradim ka mbi dy vjet që është bërë me urgjencë në 18 Gusht të vitit 2023. “Ligji e përcakton që bëhet vetëm një kërkesë. Dhe sikur të kishte do të ishte në vazhdën e tymnajës…”, shkruan ai. Ish zv.kryeministri ka komentuar edhe informacionet e dala nga SPAK, sipas të cilave i është zbuluar një transfertë prej 3 milionë eurosh drejt Austrisë. Ahmetaj e konsideron një tjetër lajm të rremë dhe flet me bindje se një transfertë e tillë nuk ekziston. Këtë, vijon ai, e di mirë edhe vetë prokurori që po e heton. Ish ministri i Financave e mbyll reagimin duke thënë se lajmet e dala për të këto ditë janë zhurmë e regjimit për të hequr vëmendjen nga skandalet e fundit të qeverisë dhe bashkëpunimi i saj me krimin e organizuar dhe kartelet e drogës.