Shqipëria vijon të mbajë një qëndrim të qartë dhe të palëkundur në mbrojtje të integritetit territorial, sovranitetit dhe pavarësisë së Ukrainës, në përputhje me qëndrimin e BE-së, NATO-s dhe SHBA-së, kundër agresionit rus. Ky qëndrim i vendit është theksuar akoma më shumë gjatë konferëncës ndërkombëtare “Lennart Meri” që u mbajt në kryeqytetin e Estonisë, Talin. Pjesë e konferëncës ishte dhe ministri shqiptar për Europën dhe Punët e jashtme Igli Hasani. Në takimin me kryeminsitren e Estonisë Kaja Kallas dhe Ministri i Punëve të Jashtme të Ukrainës, Dmytro Kuleba, Hasani tha se agresioni rus në Ukrainë vijon të mbetet kërcënimi më kritik për paqen dhe sigurinë në kontinentin evropian dhe më gjerë. “Shqipëria mbështet në mënyrë aktive përpjekjet dhe iniciativat e ndërmarra për të siguruar përgjegjësi të plotë për krimet më të rënda sipas ligjit ndërkombëtar të kryera në Ukrainë. Duke i qëndruar krah Ukrainës, Shqipëria po e mbështet atë politikisht, ekonomikisht dhe ushtarakisht, deri në arritjen e një paqeje të drejtë dhe të qëndrueshme”.