Presidenti i Ukrainës, Volodymyr Zelensky, ka firmosur një marrëveshje me Këshillin e Evropës për krijimin e një tribunali ndërkombëtar, i cili do të ndjekë penalisht zyrtarë të lartë politikë dhe ushtarakë përgjegjës për pushtimin rus të Ukrainës. Tribunali do të fokusohet në ndjekjen e krimeve të agresionit dhe mund të përfshijë hetime ndaj drejtuesve të nivelit të lartë rus, përfshirë presidentin Vladimir Putin. Gjatë nënshkrimit të marrëveshjes në Strasburg me Sekretarin e Përgjithshëm të Këshillit të Evropës, Alain Berset, Zelensky deklaroi:“Çdo kriminel lufte duhet ta dijë se do të ketë drejtësi dhe kjo vlen edhe për Rusinë.” Sipas Këshillit të Evropës, mandati i tribunalit do të përfshijë ndjekjen e vendimmarrësve që urdhëruan përdorimin e forcës së armatosur në kundërshtim me Kartën e OKB-së. Po ashtu, shtetas të vendeve të tjera si Bjellorusia apo Koreja e Veriut mund të përfshihen në hetime nëse provohet përfshirja e tyre në agresionin ndaj Ukrainës. Berset theksoi rëndësinë e zbatimit universal të të drejtës ndërkombëtare, pa standarde të dyfishta. Ai shpreson që tribunali të fillojë punën vitin e ardhshëm, megjithëse vendndodhja e selisë së tij ende nuk është përcaktuar.