Një agjent i FBI-së i cili kishte punuar për Rusinë gjatë kohës së Bashkimit Sovjetik, i njohur si një nga spiunët që shkaktoi më shumë dëme në historinë e SHBA-së, u gjet i vdekur në qelinë e tij të burgut. Robert Hanssen u gjet i vdekur në burgun e sigurisë maksimale në Kolorado mëngjesin e të hënës. 79-vjeçari kishte marrë para dhe sende të vlefshme, si gurë të çmuar, në një vlerë prej mbi 1.4 milion dollarësh nga rusia. 300 agjentë kishin punuar për të hetuar rastin e tij. Ai u dënua në vitin 2002 me burg të përjetshëm për spiunazh. Shkaku i vdekjes së tij nuk është konfirmuar ende nga autoritetet. Hanssen jetonte në një shtëpi modeste me katër dhoma gjumi në periferi të Virxhinias me gruan dhe gjashtë fëmijët e tij përpara arrestimit. Për shkak të rolit të tij në FBI, ai kishte akses në informacione të klasifikuara dhe në vitin 1985 filloi aktivitetin e tij kriminal, duke dërguar materiale në Rusi dhe ish-Bashkimin Sovjetik. Hanssen, i cili u bë oficer i FBI-së më 12 janar 1976, përdorte pseudonimin “Ramon Garcia” kur komunikonte me bashkëpunëtorët e tij rusë.