Një agjent amerikan i imigracionit ka qëlluar për vdekje një 37-vjeçare në qytetin e Minneapolisit, duke shkaktuar protesta gjatë natës. Zyrtarët federalë thanë se 37-vjecarja, Renee Nicole Good, ishte përpjekur të shtypte agjentët e imigracionit me makinën e saj, por kryebashkiaku i qytetit tha se agjenti që e qëlloi kishte vepruar në mënyrë të pamatur. Videot e incidentit tregojnë agjentët e emigracionit duke iu afruar një makine. Ndërsa makina tenton të largohet, njëri prej tyre i drejton armën dhe dëgjohen të paktën dy të shtëna. FBI-ja po heton rastin. Qindra agjentë të emigracionit janë vendosur në Minneapolis, në shtetin e Minesotës, si pjesë e masave të marra nga Shtëpia e Bardhë kundër imigracionit të paligjshëm. Videot e postuara në mediat sociale duket se tregojnë momentin e të shtënave, të cilat ndodhën rreth orës 10:25 lokale të mërkurën në mëngjes. Nga pika të ndryshme të vëzhgimit, një Fuoristradë ngjyrë gështenjë, mund të shihet duke bllokuar një rrugë në Minneapolis. Një turmë njerëzish, që duket se po protestojnë, qëndrojnë në trotuar. Automjetet e ICE, Zyra e emigracionit dhe doganave, ndalojnë te automjeti i parkuar në rrugë, agjentët dalin prej tyre dhe i thonë gruas pas timonit të dalë jashtë. Njëri prej agjentëve tërheq dorezën e derës së shoferit. Një agjent tjetër është pozicionuar pranë pjesës së përparme të automjetit. Nuk është e qartë saktësisht se sa afër qëndron agjenti ose nëse është goditur nga automjeti nga pamjet që qarkullojnë, por në një moment, ai hap zjarr ndërsa gruaja tenton të largohet. Pas kësaj, fuoristrada shihet teksa përplaset me një makinë të parkuar aty pranë. Në një postim në Truth Social, Donald Trump tha se një oficer i emigracionit u përplas "egërsisht" me makinë. "Është e vështirë të besohet se është gjallë, por tani po shërohet në spital", shkroi ai. Presidenti republikan fajësoi gjithashtu "të Majtën Radikale" për "kërcënim, sulm dhe shënjestrim të Zyrtarëve të Zbatimit të Ligjit dhe Agjentëve të emigracionit çdo ditë". Edhe sekretarja e sigurisë kombëtare, Kristi Noem, tha se gruaja po pengonte oficerët në punën e tyre dhe se agjenti u detyrua të përdorë armën në shenjë vetëmbrojtjeje.