Agjentët federalë të emigracionit të vendosur në Minneapolis të Minesotës, së shpejti do të pajisen me kamera trupore, tha Departamenti Amerikan i Sigurisë Kombëtare. Njoftimi vjen ndërsa qeveria përballet me një reagim të ashpër për vrasjen muajin e kaluar të dy qytetarëve amerikanë - Alex Pretti dhe Renee Good – nga të shtënat e agjentëve federalë, prania e të cilëve është rritur shumë në Mineapolis si pjesë e një operacioni kundër imigracionit. "Duke hyrë menjëherë në fuqi, ne po vendosim kamera trupore për çdo oficer në terren në Minneapolis," shkroi Sekretarja e Departamentit të sigurisë Kombëtare Kristi Noem në X. Mjeku Ligjor i Qarkut Hennepin e ka cilësuar vdekjen e Pretti-t më 24 janar si vrasje pavarësisht se kjo nuk do të thotë domosdoshmërisht se ka ndodhur një krim. Raporti i së hënës nga mjeku ligjor tha se Pretti kishte pësuar "plagë të shumëfishta me armë zjarri" të qëlluara nga një ose më shumë oficerë të zbatimit të ligjit. Ai shtoi se ai vdiq në dhomën e urgjencës në Qendrën Mjekësore të Qarkut Hennepin në Minneapolis. Sipas zyrës së emigracionit dhe doganave, dy agjentët e përfshirë në vdekjen e Prettit mbanin kamera në trup. Ata janë pezulluar nga puna, tha agjencia. Departamenti amerikan i Drejtësisë ka hapur një hetim për vdekjen e Prettit. Noem tha se sapo të jenë të disponueshme fondet, programi i kamerave në trup do të zgjerohet në të gjithë vendin. I pyetur për njoftimin e Noem, Presidenti Donald Trump tha se kamerat në trup "në përgjithësi kanë tendencë të jenë të mira për zbatimin e ligjit sepse njerëzit nuk mund të gënjejnë për atë që po ndodh".