Afrika e Jugut bllokoi transferimin e 50 mijë predhave 155 milimetërshe të porositura nga Polonia nga kompania Denel Munition. Bllokimi u bë me arsyetimin se predhat mund të dërgohen në Ukrainë. Marrëveshja për prodhimin e predhave u firmos në vitin 2021 me kompaninë Denel Munition, nëndegë e kompanisë gjermane Rheinemetall. Polonia kërkon të mbushë magazinat e saj me një milion predha artilerie 155 milimetërshe për t'u mbrojtur kundër një sulmi të mundshëm rus. Industria vendase e saj mund të prodhojë vetëm 30 mijë të tilla në vit, me nënkontraktorë edhe nga Sllovakia. Në mars 2023, qeveria polake miratoi një rezolutë konfidenciale për të zgjeruar prodhimin dhe blerjen e municioneve. Varshava ka vendosur gjithashtu furnizime me predha artilerie nga Koreja e Jugut dhe po shqyrton ndërtimin e një fabrike për të rritur prodhimin vendas. Ukraina është gjithashtu partnere me Rheinmetall, një nga prodhuesit kryesorë gjermanë të armëve.