Ministrja e Jashtme e Gjermanisë, Annalena Baerbock, ka dënuar qeverisjen e Afganistanit nga Talibanët, në dyvjetorin e marrjes së pushtetit nga ana e tyre. “Dy vjet sundim nga talibanët nënkupton dy vjet kthim mbrapa drejt Epokës së Gurit për njerëzit e Afganistanit”, tha Baerbock. Miliona njerëz në Afganistan po vuajnë nga uria nën sundimin e talibanëve, të cilët për çdo ditë po ua heqin nga një të drejt grave dhe vajzave, tha ajo. Baerbock e hodhi poshtë mundësinë që Gjermania t’i normalizojë marrëdhëniet me qeverinë talibane, e cila nuk është njohur nga asnjë shtet deri tani. Talibanët e morën pushtetin në dorë më 15 gusht të vitit 2021, pas largimit të forcave të SHBA-së dhe NATO-s. Që nga atëherë Afganistani i ka humbur ndihmat për zhvillimin e vendit dhe mbështetjen financiare nga donatorët perëndimorë. Pasi mbeti nën sundimin taliban, Afganistani u bë njëri prej vendeve të goditura më rëndë nga kriza në botë, pasi më shumë se 28 milionë njerëz, apo rreth dy të tretat e popullsisë së tij, ka nevojë urgjente për ndihma humanitare, sipas Human Rights Ëatch. Qeveria teokratike e talibanëve ka vendosur kufizime në çdo aspekt të jetës në Afganistan, përfshirë paraqitjet fizike të banorëve, në liri të lëvizjes, në të drejtën për të punuar e studiuar, si dhe në format e argëtimit.