Këshilli i Ministrave vendosi të shtyjë afatin e qëndrimit të afganëve në Shqipëri. Strehimi i afganëve u konceptua fillimisht si një periudhë tranzitore për një vit me destinacion final Shtetet e Bashkuara të Amerikës. Për pranimin e afganëve, Shqipëria ka marrë përgëzime nga Uashingtoni, ku së fundmi sekretari amerikan i shtetit, Antony Blinken gjatë vizitës së tij në Tiranë, falenderoi qeverinë shqiptare për këtë akt, pas takimit që pati me afganët që janë në proces të marrjes së vizës së posaçme. Me vendim të këshillit të ministrave, afganëve që ndodhen ende në Shqipëri u shtyhet qëndrimi deri në datën 24 gusht të këtij viti.