Agjencia për inteligjencë të brendshme në Gjermani e ka shpallur partinë Alternativa për Gjermaninë (AfD) organizatë ekstremiste të krahut të djathtë. Agjencia, e quajtur Zyra Federale për Mbrojtjen e Kushtetutës, tha se tani ka konfirmuar këtë cilësim për AfD-në, pasi sipas saj, tashmë ka të dhëna konkrete që partia antimigrant, e themeluar më 2013, ndjek qëllime që kërcënojnë rendin demokratik të Gjermanisë. “Kuptimi i partisë për popullin, i bazuar në përkatësinë etnike dhe prejardhje, nuk është në përputhje me rendin demokratik dhe të lirë”, tha agjencia. Qëndrimet e partisë dhe udhëheqësve të AfD-së shkelin parimet kushtetuese të paprekshmërisë të dinjitetit njerëzor, thanë zëvendëspresidentetët e agjencisë, Sinan Selen dhe Silke Ëillems. AfD-ja, që doli e dyta në zgjedhjet e fundit parlamentare të mbajtura këtë vit në Gjermani, më herët kishte pasur statusin e grupit “të dyshuar” ekstremist. Kjo parti e sfidoi këtë cilësim të agjencisë në gjykatë, por pa sukses. Konstatimi i agjencisë së inteligjencës së brendshme, bazuar në një raport ekspertësh prej 1,100 faqesh, se AfD është raciste dhe anti-muslimane u lejon tani autoriteteve të rrisin mbikëqyrjen e partisë, duke përfshirë rekrutimin e informatorëve konfidencialë dhe përgjimin e komunikimeve.