Partia Demokratike thërret Kuvendin Kombëtar më 30 maj 2026, në orën 11:00. Sipas njoftimit zyrtar, është ndryshuar vendimi i 17 marsit me anë të të cilit Kuvendi Kombëtar i PD do të mblidhej më 6 qershor. Ky vendim vjen një ditë para përfundimit të afatit për regjistrimin e kandidatëve për kryetar të PD-së, të enjten e 30 prillit deri në orën 12: 00, ndërsa pritet që këto zgjedhje të zhvillohen më 23 maj. Në rendin e ditës së Kuvendit Kombëtar përfshihen diskutime mbi situatën aktuale politike, sfidat e integrimit evropian, si dhe problematika që lidhen me funksionimin e demokracisë dhe shtetit ligjor. Një nga pikat kyçe të këtij Kuvendi pritet të jetë përcaktimi i vijës së aksionit politik të Partisë Demokratike për periudhën në vijim. Po ashtu, grupet e punës do të prezantojnë propozimet për ndryshime statutore, të cilat pritet të diskutohen dhe miratohen gjatë mbledhjes. Në agjendë janë përfshirë edhe nisma që lidhen me modernizimin e partisë dhe riorganizimin e strukturave, si dhe zgjerimin e tyre në diasporë. Gjatë punimeve të Kuvendit Kombëtar do të bëhet edhe zgjedhja e anëtarëve të Këshillit Kombëtar.