Shtetet e Bashkuara, Koreja e Jugut dhe Japonia kanë zhvilluar stërvitje të përbashkëta detare, në të cilat u përfshi një aeroplanmbajtëse amerikane, për të siguruar gatishmërinë kundër kërcënimeve bërthamore dhe raketore nga Koreja e Veriut, tha marina e Seulit të premten. Koreja e Veriut e ka përshpejtuar zhvillimin e armëve, dhe javën e kaluar e testoi një raketë hipersonike me lëndë djegëse të ngurtë. Të mërkurën, lideri koreanoverior Kim Jong Un tha se tani është koha e duhur për të qenë më të përgatitur për luftë se asnjëherë më parë, duke përmendur gjendjen e paqëndrueshme gjeopolitike. “Forcat pjesëmarrëse kryen stërvitje luftarake kundër nëndetëseve, për të përmirësuar reagimin ndaj kërcënimeve që vijnë nga Koreja e Veriut, përfshirë nëndetëset dhe raketat balistike të lëshuara prej tyre”, tha marina e Koresë së Jugut në një komunikatë. Stërvitjet dyditore, të mbajtura në ujërat ndërkombëtare mes Koresë së Jugut dhe Japonisë të enjten dhe të premten, mblodhën bashkë aeroplanmbajtësen Theodore Roosevelt dhe destrojerët Hoëard, Russell dhe Daniel Inouye, me luftanijet nga fqinjët aziatikë.