Temperaturat e ulëta zhytën pjesë të Evropës në një tjetër ditë kaosi udhëtimesh, me të paktën gjashtë persona që humbën jetën në aksidente të lidhura me motin gjatë valës më të madhe të të ftohtit në kontinent deri më tani këtë dimër. Që nga rënia e temperaturave të hënën, pesë persona kanë vdekur në Francë dhe një grua në Bosnje, ndërsa bora dhe shiu i dendur shkaktuan përmbytje dhe ndërprerje të energjisë elektrike në të gjithë Ballkanin. Me të ftohtin që i bën rrugët të rrezikshme, tre persona vdiqën në aksidente të lidhura me akullin në Francën jugperëndimore ndërsa një shofer taksie vdiq në spital pasi automjeti i tij doli nga rruga dhe u zhyt në lumin Marne në rajonin e Parisit. Pasi gati 40 centimetra borë ranë në kryeqytetin boshnjak Sarajevë gjatë fundjavës, një grua vdiq në spital pasi u godit nga një pemë që u shemb nën peshën e borës. Reshjet e borës nuk janë ndalur edhe në Holandë me aeroportin e Schipolit, në Amsterdam, që raportoi se rreth 600 fluturime u anuluan gjatë ditës, ndërsa ekipet punonin për të pastruar pistat dhe për të shkrirë akullin e aeroplanëve që prisnin të niseshin. Më shumë borë parashikohet për pjesën tjetër të javës. Telashe pati edhe në aeroporte të tjera të evropës e po ashtu edhe me linjat hekurudhore.