Është shtyrë për të shtunën në orën 12:30 seanca në GJKKO për Ilir Beqaj dhe 5 të tjerë të cilët akuzohen për abuzim me fondet e BE-së, gjatë kohës që ish-ministri ishte në krye të SASPAC. Seanca e sotme për verifikimin e kushteve të masës nisi në orën 09:30 në Gjykatën e Posaçme për Korrupsionin dhe Krimin e Organizuar, por u shty pasi avokatët kërkuan kohë për dosjen. SPAK caktoi një ditë më parë 3 masa sigurie “arrest me burg” për Ilir Beqajn, Ermal Kurtulajn, Alfred Nikollajn, ndërsa u lëshuan katër masa të tjera sigurie, 2 prej të cilave “arrest me burg” dhe 2 “detyrim paraqitje”. Sipas hetimeve, Beqaj i prangosur për korrupsion dhe mos deklarim të të ardhurave, dyshohet se bashkëpunoi me koordinatorin e projektit Ermal Kurtulaj, për prokurimet fiktive dhe në kundërshtim me kontratat e ndihmës së BE. Sipas SPAK, Ilir Beqaj ka investuar gati 21.411 euro dhe 4 milionë lekë, përmes blerjes së aseteve, dhe 34.783 euro i ka raportuar në formën e shpenzimeve, duke mos i deklaruar ato si hua ndaj shoqërisë.