Kryetari i Aleancës për Ardhmërinë e Kosovës, Ardian Gjini refuzoi ftesën e kryeministrit në detyrë Albin Kurti, për të pasur një takim lidhur me krijimin e institucioneve të reja të Kosovës. Në letrën që i drejtoi Kurtit, ai shprehet se Aleanca nuk ka kurrfarë interesi për t’u bërë pjesë e qeverisë së re, ndërsa për themelimin e institucioneve mund të ndihmojnë, në rast se Vetëvendosje pranon kërkesat e tyre. Në shkresë thuhet se Aleanca ka gjashtë kërkesa që beson se shkojnë në interes të qytetarëve por nuk ka marrë asnjë përgjigje për to. Këto pika janë: “Orientimi Strategjik dhe Gazi Amerikan – Pranimi i menjëhershëm i projektit të gazit amerikan si prioritet strategjik dhe jetik shtetëror. Pavarësia Energjetike – Nisja e menjëhershme e procedurave për ndërtimin e termocentralit të ri me thëngjill, për të garantuar sigurinë energjetike të vendit. Lehtësimi për Bizneset e Vogla – Ngritja e pragut të TVSH-së nga 30 mijë euro në 100 mijë euro. Mbështetja për Bujqësinë – Lirimi i tokës së punuar nga tatimi në pronë për nxitjen e prodhimit vendor. Buxhetimi i Infrastrukturës – Financimi i plotë i projekteve rrugore dhe kapitale të mbetura pezull. Fondi Emergjent për Kryeqytetin – Ndarja e 800 milionë deri në 1 miliard euro investime kapitale për Prishtinën.” – thuhet në letër.