Ministri i Jashtëm i Iranit ka pranuar se në centralet bërthamore janë shkaktuar dëme "të mëdha dhe serioze" nga bombardimet e fundit të SHBA-së dhe Izraelit. Abbas Araghchi tha për mediat vendase të enjten në mbrëmje se një vlerësim i dëmit po kryhet nga Organizata e Energjisë Atomike e Iranit. Por, vetëm disa orë më herët se kuy qëndrim, Udhëheqësi Suprem i Iranit, Ajatollah Ali Khamenei, tha se sulmet nuk e prishën programin bërthamor të vendit. Një mesazh ky kundër presidentit amerikan Donald Trump i cili tha se bombat kishin "shkatërruar plotësisht" të tre centralet bërthamore. Khamenei tha se sulmet e SHBA-së nuk kishin arritur “asgjë domethënëse”. Udhëheqësi suprem, i cili vijon të qëndrojë i fshehur që nga fillimi i luftës me Izraelin më 13 qershor, këmbënguli se Trump e kishte “ekzagjeruar” ndikimin e bombave dhe shpalli fitoren ndaj SHBA-së dhe Izraelit. Por qëndrimet e Araghchi-t krijojnë një përshtypje të ndryshme. Ai tha gjithashtu se nuk kishte plane për të rifilluar bisedimet bërthamore me SHBA-në. Irani anuloi raundin e gjashtë të bisedimeve me SHBA-në ditën Izraeli filloi sulmet.“Dua të deklaroj qartë se nuk është arritur asnjë marrëveshje, rregullim apo bisedë për të filluar negociata të reja", tha ai ndërsa shtoi se qeveria po shqyrtonte se çfarë ishte në "interes të popullit iranian", duke sqaruar se qasja e saj ndaj diplomacisë do të marrë një "formë të re". Të mërkurën, parlamenti i Iranit miratoi një projektligj për të ndaluar bashkëpunimin me mbikëqyrësin global bërthamor, Agjencinë Ndërkombëtare të Energjisë Atomike (IAEA). Nëse zbatohet, kjo do të thotë se Irani nuk është më i angazhuar për të lejuar inspektorët bërthamorë në vendet e tij.