Në një kohë kur qasja e politikës vendase ndaj SPAK-ut po merr nota kritike, mbështetja e Bashkimit Europian ndaj drejtësisë së re mbetet e palëkundur. Pasi ndoqi nga afër procesin e zgjedhjes së kreut të ri të Prokrorisë së Posaçme Antikorrupsion, ambasadori Silvio Gonzato pati edhe një takim kokë më kokë me Klodjan Brahon, pak ditë pas marrjes së stafetës për drejtimin e SPAK. “Takimi i parë me Kryetarin e ri të SPAK-ut, Klodjan Braho. E përgëzova për arritjet e SPAK-ut deri më sot dhe nënvizova rëndësinë e vazhdimit të ofrimit të rezultateve të prekshme në luftën kundër krimit të organizuar dhe korrupsionit, një faktor kyç në përparimin e Shqipërisë drejt anëtarësimit në BE. Forcimi i kapaciteteve hetimore dhe sigurimi i standardeve të larta në hetime dhe ndjekje penale është çelësi për konsolidimin e progresit dhe arritjen e rezultateve të qëndrueshme. BE-ja mbetet plotësisht e përkushtuar për të mbështetur SPAK-un dhe sundimin e ligjit në Shqipëri.”