Marrëveshja e ekstradimit e firmosur mes Shqipërisë dhe SHBA-së ka mbërritur në Parlamentin shqiptar dhe pritet nëse deputetët do ta miratojnë përpara zgjedhjeve të 25 prillit, apo do të presin Kuvendin e ri për t’i hapur dritën jeshile këtij pakti të rëndësishëm. Projektligji “Për Ratifikimin e traktatit të ekstradimit ndërmjet qeverisë së republikës së Shqipërisë dhe qeverisë së Shteteve të Bashkuara të Amerikës”, u firmos mes ministres së Drejtësisë, Etilda Gjonaj dhe ambasadores amerikane Yuri Kim në 23 dhjetor të vitit të kaluar. Marrëveshja e siguruar nga Gazeta “Shqip” parashikon disa lloje krimesh që mund të shërbejnë si shkak për ekstradimin e shtetasve për të dyja vendet në rast të konsumimit të një krimi. E veçanta e këtij pakti ekstradimi është se ai ka fuqi prapavepruese dhe përfshihen edhe veprat penale para hyrjes në fuqi. Por a do të ekstradohen politikanët dhe zyrtarët e korruptuar drejt SHBA-ve? Siç dihet Departamenti Amerikan i Shtetit ka marrë disa vendime për të shpallur “persona non grata” disa ish-zyrtarë dhe politikanë në Shqipëri. Një pjesë e mirë ish-zyrtarëve apo ish-deputetëve apo dhe politikanëve shqiptarë mbajnë edhe shtetësinë amerikane. Në nenin 3 të këtij Traktati parashikohet ekstradimi reciprok i shtetasve, duke mos lënë mundësi refuzimi për shkak shtetësie të personit të kërkuar. Gjithashtu drafti përcakton se Shqipëria mund të ekstradojë persona për vepra të ndryshme penale duke marrë garancinë se në shba atij nuk do t’i jepet dënimi me vdekje. Neni katër parashikon që veprat penale politike dhe ushtarake, duke përcaktuar se ekstradimi nuk pranohet, nëse vepra penale për të cilën kërkohet ekstradimi është vepër penale politike. Po ashtu në nenin 13 janë parashikuar më vete tri situata, duke u përcaktuar me terma të veçantë rasti i shtyrjes së procedurave të ekstradimit, shtyrja e dorëzimit dhe dorëzimi i përkohshëm. Ky parashikim i ri, sjell si pasojë zgjidhjen e problematikave të hasura në praktikë dhe ende të parregulluara lidhur me këtë aspekt.