Gjykata e Posaçme ka pranuar kërkesën e SPAK për konfiskimin e disa pasurive me vlerë rreth 700 mijë euro, të Raul Zenunajt. Të dënuarit për drogë në Itali I konfiskohen 2 njësi biznesi në Vlorë dhe një bodrum, që Zenunaj i kishte blerë në vitet 2012-2013, në vlerën 200 milionë milionë lekë të vjetra në total, dhe një apartament të blerë mbi 100 milionë lekë të vjetra po në Vlorë, një makinë BMV, 5 mijë m² arë dhe 100 m² truall në Vlorë, një shtesë 4 katëshe me sipërfaqe 640 m², për të cilën kishte investuar mbi 200 milionë lekë të vjetra. Raul Zenunaj ishte në mesin e 27 personave të arrestuar në vitin 2019, në kuadër të operacionit “Lulet e Pranverës”, operacion i shtrirë në disa qytete të Shqipërisë si dhe në Itali, ndërsa më herët ishin arrestuar edhe persona të tjerë. Në atë kohë, Policia goditi katër grupe kriminale, ndaj të cilëve u organizuan 26 operacione. Operacioni i realizuar në fillim të shkurtit 2019, erdhi pas një hetimi dyvjeçar, midis Prokurorisë së Krimeve të Rënda dhe Prokurorisë së Leçes. Gjatë operacionit, u sekuestrua një sasi prej rreth 9 tonë drogë e llojit kanabis sativa.