8 viktima është numri I bilancit të aksidenteve të ndodhura në vetëm 5 ditët e para të fillimvitit 2026. Një aksident fatal vetëm pak orë pas ndërrimit të viteve ndodhi në aksin “Gjirokastër-Tepelenë” në vendin e quajtur “Bypass”, ku humbën jetën si pasojë e plagëve të marra, Klejdi Myftari 24 vjeç, Anxhelo Ruçi 27 vjeç, dhe Martin Dulaj, 25 vjeç. Vetëm disa orë më vonë, më 2 janar në Lezhë, si pasojë e lagështirës në rrugë, makina benz me të cilën udhëtonin çifti I bashkëshortëve Petrit dhe Elona Florini u aksidentua duke sjellë vdekjen e tyre, dhe plagosjen e dy personave të tjerë që po udhëtonin me automjetin tip Porsche. Një aksident fatal rezultoi edhe në zonën e Mulletit, mbrëmjen e 3 janarit, ku një autobus I linjës që shkonte në Krrabë përplasi një këmbësor 56-vjeç në vendin e quajtur “Ura e Peshkatarit”, I cili për pasojë ndërroi jetë. Drejtuesi I autobusit të linjës u vendos në pranga. Edhe ditën e dielë një aksident me vdekje u shënua në Durrës, në vendin e quajtur “Marfish”, ku një 28-vjeçar përplasi me makinën e tij për vdekje një 68 vjeçar, kalimtar. Drejtuesi I automjetit akuzohet për veprën penale “Shkelja e rregullave të qarkullimit rrugor”. Edhe Mëngjesin e kësaj të hëne, në aksin rrugor “Peqin–Elbasan”, në fshatin Bradashesh, një 46 vjeçare këmbësore, është përplasur nga një automjet. Si pasojë e dëmtimeve të marra, këmbësorja ka ndërruar jetë në spital.